Amaravati News Telugu News Portal
తాడేపల్లి రూరల్‌: 15 రోజుల క్రితం ఉండవల్లి గ్రామానికి చెందిన ఒక బాలిక (14) అనంతపురం జిల్లా రాప్తాడు మండలం రమణపల్లికి చెందిన ఎం.విజయకుమార్‌కు షేర్‌చాట్‌లో మెసేజ్‌ పంపించింది. అప్పటి నుంచి ప్రతిరోజూ బాలిక, ఆ యువకుడు షేర్‌చాట్‌లో మెసేజ్‌లు చేసుకుంటున్నారు.
తనను ఇంట్లోంచి తీసుకువెళ్లిపోమని, లేదంటే చనిపోతానని మెసేజ్‌ పెట్టడంతో విజయకుమార్, అతని సోదరుడు నవీన్‌ ఆదివారం అనంతపురం నుంచి బయల్దేరి సోమవారం విజయవాడలోని ఓ హోటల్‌కు వచ్చారు. విషయాన్ని తెలుసుకున్న ఆమె తల్లిదండ్రులు, బంధువులు హోటల్‌కు వెళ్లి యువకులను పట్టుకుని తాడేపల్లి పోలీసులకు అప్పగించారు. మెసేజ్‌ చేసింది బాలిక అనుకోలేదని, తాను డిగ్రీ పూర్తి చేశానని ఆమె తనతో చెప్పిందని విజయకుమార్ పోలీసులకు చెప్పాడు. పోలీసులు కేసు నమోదు చేసి దర్యాప్తు చేస్తున్నారు.
